Во херојски потег полицаец го застрела терористот од Бондај од 45 метри

Австралиските медиуми објавија дека полицаецот кој го спречи смртоносниот антисемитски напад на плажата Бондај е детективот Сезар Бараза.

Ново објавените видеа ги откриваат ужасните детали од масакрот во кој беа убиени најмалку 15 лица и ја покажуваат неверојатната храброст на Бараза, кој, вооружен само со пиштол, неутрализира еден од напаѓачите на растојание од речиси 45 метри, помагајќи да се стави крај на најлошото масовно пукање во Австралија во последните 30 години, пишува Си-ен-ен.

Се верува дека Бараза го убил 50-годишниот Саџид Акрам. Неговиот син и соучесник, 24-годишниот Навид, неколку минути подоцна бил застрелан и сериозно повреден. Стоејќи на пешачки мост покрај Кембел парејд, главната сообраќајница покрај плажата Бондај, се вели дека таткото и синот користеле сачмарки и пушки за да пукаат во десетици семејства кои ја славеле првата ноќ на Ханука.

Снимките објавени на социјалните мрежи, чија автентичност е потврдена од Си-ен-ен, го прикажуваат целиот напад како се одвива за нешто повеќе од шест минути. Терористичкиот напад започна во недела, 15 декември, во близина на паркот Арчер.

Надзорната камера ги сними првите жртви, Борис и Софија Гурман, кои беа убиени откако храбро се обидоа да го разоружаат едниот од напаѓачите. Снимката понатаму го прикажува Навид Акрам како отвора оган од пешачки мост додека неговиот татко Саџид се упатува кон паркот каде што се одржува прославата.

Таму, Саџид се соочува со невооружениот Ахмед Ал Ахмед, татко на две деца, кој успеа да го собори и да му ја земе пушката. Додека Саџид се враќа кон мостот, друг минувач, Реувен Морисон, кој подоцна беше убиен, фрла разни предмети кон него.

Околу една минута подоцна, Саџид му се придружува на својот син на мостот. Потоа во позадината на видеото се појавува човек во темни панталони и светла кошула – детективот Сезар Бараза. Тој зазеде одбранбена позиција покрај дрво, нишанеше и испука истрел што го уби Саџид.

Преживеаниот вооружен напаѓач, Навид, потоа возвраќа оган кон полицаецот повеќе од една минута пред да биде погоден од втор куршум. Не е јасно дали и тој истрел бил испукан од Бараза или од некој од неговите колеги кои во меѓувреме пристигнале на местото на настанот.

Анализата на снимката покажува дека Бараза бил на околу 45 метри од напаѓачот, што се смета за исклучително тежок истрел за пиштол, дури и за најискусните стрелци. Аудио анализата на десетминутниот клип откри дека за време на нападот биле испукани најмалку 100 куршуми, и од напаѓачите и од полицијата.

Навид Акрам бил уапсен и однесен во болница во критична состојба. Во среда, на 18 декември, полицијата го обвини за 54 кривични дела, вклучувајќи извршување терористички акт и 15 обвиненија за убиство.