Ердоган згрме: Грчкиот премиер да се прибере!
Турскиот претседател Реџеп Таип Ердоган изјави дека нема да се сретне со грчкиот премиер Киријакос Мицотакис додека тој не се прибере, објави денеска НТВ.
Историските ривали, Турција и Грција, се судираат за различни прашања, како што се поморските граници, изворите на фосилни горива во Медитеранот и етнички поделениот Кипар.
Ердоган рече дека Мицотакис „повеќе не постои за него“ откако грчкиот премиер лобираше САД да не ѝ продаваат борбени авиони Ф-16 на Турција.
„Нека се согласат. Ние нема да се сретнеме додека не се приберат“, им рече Ердоган на новинарите на враќање од самитот на НАТО во Мадрид.
Мицотакис вчера изјави дека Грција е отворена за дијалог со Турција, но повтори дека нема намера вербално да се судри со Ердоган.
„Ќе продолжам да инсистирам дека вратата на Грција е секогаш отворена за дијалог. Но, во исто време, нашата земја ќе продолжи, секогаш кога има можност, да покренува прашања за турската агресија во Европската унија, билатерално или со сојузниците“, рече Мицотакис, додавајќи дека Грција „создава свои сојузи“ и сака поддршка од сојузниците во националните прашања, но и Турција како соговорник.
Ердоган бил налутен од Мицотакис поради, како што вели, откажувањето од ветувањето дека заедно ќе разговараат за билатерални прашања без да се вклучат други страни.
