Стрмоглав пад на продажбата на недвижнини во Дубаи

Продажбата на недвижнини во Дубаи драстично се намали, тврди водечки аналитичар на пазарот, откако војната на Блискиот Исток предизвика нагло забавување на еден од најскапите пазари на недвижности во светот.

Продажбата во градот падна за 19 проценти во мај во споредба со претходниот месец, што е забрзување на падот во споредба со априлскиот пад од 4 проценти, според истражувањето на Валустрат. Бројот на трансакции сега е под половина од нивото забележано во истиот период минатата година, според анализата.

„Пазарот на готови недвижности не забележал годишен пад од ваков обем од пандемијата“, вели Хајдер Туаима, раководител на истражувањето на недвижности во Валустрат, консултантска компанија со седиште во Дубаи која го следи пазарот од 2014 година.

Специјална анализа од истражувачката компанија Реидин покажа дека во мај е продаден недвижен имот во вредност од 22,5 милијарди дирхами (6,1 милијарди долари), што е за 42 проценти помалку отколку во април. Тоа е приближно половина од 46,6 милијарди дирхами регистрирани во месецот пред почетокот на конфликтот, според податоците првично објавени од Блумберг.

Дубаи, кој се наоѓа на источната страна од Арапскиот Полуостров, доживеа бум на пазарот на недвижности во последниве години, поттикнат од доаѓањето на луѓе со високи приходи привлечени од политиката на нула данок на доход, пишува Гардијан.

Но, избувнувањето на војната на Блискиот Исток кон крајот на февруари го потресе пазарот, а во март иранска ракета погоди луксузен хотел во познатата област Палм Џумеира во Дубаи. Сè уште не е јасно колку брзо пазарот би можел да се опорави ако се одржи мировниот договор меѓу САД и Иран.

Продавачите на луксузни вили и станови во градот веќе ги намалија своите цени за десетици милиони фунти, според агентите за недвижности.

Јасин Валимула, агент во Дубаи специјализиран за недвижности вредни најмалку 10 милиони долари (7,5 милиони фунти), вели дека малкуте преостанати продажби сега се склучуваат со попусти од 20 до 25 проценти во однос на вредностите пред конфликтот.

„Во последната година и пол, продадовме недвижнини на супер богати клиенти, сите сега го напуштија Дубаи. Во март имаше голема паника и ситуацијата не е јасна дури ни денес. Купувачите од Западна Европа сега се повнимателни. Мислам дека ќе почекаат една година, можеби две, во зависност од тоа како ќе се развива ситуацијата“, предвидува Валимула.

Ова претставува силен пресврт за Дубаи, кој минатата година беше најактивниот град во светот во однос на трансакциите со луксузни недвижнини. Меѓународната агенција Најт Френк утврди дека на крајот на 2025 година, во Дубаи се продадени повеќе недвижности во вредност помеѓу 2,5 и 10 милиони долари отколку во кој било друг град во светот, пред Лондон, Њујорк, Лос Анџелес и Хонг Конг.

Во сегментот на недвижности над 10 милиони долари, Дубаи регистрираше 9.050 продажби, во споредба со 6.577 во Њујорк и 3.089 во Лондон. Но, пазарот сега се коригира, верува Валимула.

„Бројките беа екстремно високи на почетокот, особено во последните две години. Таквото ниво на пазарот во секој случај не беше одржливо. Ќе има корекција на цените, само не знаеме сè уште каков ќе биде нејзиниот ефект додека не добиеме геополитичка јасност“, вели тој.

Во меѓувреме, номадската група на супербогати се свртува кон други светски центри, како што се Милано, Лондон и Сингапур.

Ричард Вејнд од групата за недвижности Сенкорп додава дека многу посредници на некогаш расцветаниот пазар во Дубаи ќе бидат принудени да се затворат.

„Војната беше црн лебед, настан кој беше огромен и брз. Падот на продажбата врши притисок врз помалите агенции што се појавија на прегреаниот пазар. Пред десет години имаше околу 1.000 брокери, сега има околу 10.000. Тој број ќе се намали“, најави тој.