Секој ден по 27 нови хипотеки во Катастар, за три месеци вкупно 2.472 во вредност од 246 милиони евра

Најголем дел од хипотеките што се запишани во Катастарот за недвижности се од Скопје, 1.318, а нивната вредност е над 125 милиони евра

По 27 нови хипотеки секој ден или за три месеци вкупно 2.472 хипотеки. Ова може да се види во последниот квартален извештај на Катастарот за недвижности. Иако бројот на новозапишани хипотеки во Македонија бележи пад во споредба со последниот квартал од минатата година, побарувачката за станбени кредити и натаму останува висока, а на пазарот на недвижности има голем капитал кој се мери во милиони евра.

Податоците на Агенцијата за катастар на недвижности покажуваат дека најголема активност е регистрирана во март кога биле запишани 1.004 хипотеки. Во јануари нивниот број изнесувал 619, а во февруари 849, што укажува на постепено зголемување во последниот месец од кварталот. Најголем дел од хипотеките и натаму се концентрирани во главниот град. Во Центарот за катастар на недвижности Скопје во првиот квартал се запишани 1.318 хипотеки со вредност од над 125,7 милиони евра и повеќе од 3,2 милијарди денари. Тоа значи дека повеќе од половина од сите новозапишани хипотеки во државата се поврзани со недвижности во Скопје.

Во останатите 29 подрачни одделенија на Катастарот се регистрирани 1.154 хипотеки. Иако бројот е помал од Скопскиот Регион, податоците покажуваат дека интересот за финансирање преку хипотека останува присутен и во другите градови низ државата.

Сепак, споредбата со истиот период лани покажува извесно забавување на пазарот. Во првиот квартал од 2025 година биле запишани 2.596 хипотеки, односно 124 повеќе од годинава. Вредноста на тогашните хипотеки достигнувала речиси 385 милиони евра и близу 4,93 милијарди денари. Уште поизразен е падот во однос на последниот квартал од минатата година.

Во периодот октомври – декември 2025 година биле запишани 3.060 хипотеки, што значи дека во првите три месеци од годинава нивниот број е намален за 588. Вредноста на хипотеките во последниот квартал лани надминала 511 милиони евра и 8,4 милијарди денари.
Финансиските аналитичари оценуваат дека намалувањето на бројот на хипотеки не мора да значи намалување на интересот за купување недвижности. Дел од граѓаните ги одложуваат купувањата поради високите цени на становите и сè уште релативно високите каматни стапки на станбените кредити, но побарувачката останува стабилна, особено во Скопје.

Раст на станбени кредити

Податоците на Народната банка во изминатите години покажуваат континуиран раст на станбеното кредитирање. Станбените кредити остануваат меѓу најбрзо растечките категории во кредитното портфолио на банките, што укажува дека голем дел од купувањето недвижности и натаму се финансира преку задолжување. Токму затоа бројот на запишани хипотеки се смета за еден од најважните показатели за состојбите на пазарот на недвижности.
Дополнителен показател за забавување на активноста е бројот на продадени новоизградени станови. Во Регистарот на цени и закупнини во првите три месеци од годинава се регистрирани 712 новоизградени станови, односно станови купени директно од инвеститор. Во споредба со четвртиот квартал од минатата година тоа претставува намалување за 292 станови или речиси 29 проценти.

И покрај тоа, градежниот сектор не покажува знаци на стагнација. Во Агенцијата за катастар на недвижности досега се запишани 28.013 листови за предбележување градба. Станува збор за објекти кои се наоѓаат во различна фаза на изградба и кои во наредниот период треба да се појават на пазарот.
Овој податок е особено важен бидејќи укажува дека понудата на станови ќе продолжи да расте. Прашањето е дали зголемената понуда ќе биде доволна за да изврши притисок врз цените, кои во последните неколку години бележат континуиран раст.

Експертите сметаат дека во текот на 2026 година пазарот на недвижности ќе зависи од неколку клучни фактори – висината на каматните стапки, динамиката на станбеното кредитирање, движењата на платите и инфлацијата, како и од темпото со кое новите станови ќе влегуваат на пазарот.
Иако бројот на новозапишани хипотеки се намалува, речиси четвртина милијарда евра обезбедени со недвижности за само три месеци покажуваат дека пазарот останува активен. Скопје и натаму е главниот двигател на побарувачката, додека новите градби најавуваат дека понудата ќе продолжи да расте. Дали тоа конечно ќе доведе до стабилизирање на цените на становите е прашањето што најмногу ги интересира и купувачите и инвеститорите.