Морињата околу Европа се затоплуваат за шест степени над просекот: Научниците предупредуваат на сериозни последици

Климатските промени предизвикани од човекот доведоа до масовно ширење на морските топлотни бранови во европските мориња ова лето, при што температурите на водата во некои области беа и до шест Целзиусови степени повисоки од нормалните, покажа новата анализа од меѓународна група научници.

Анализата на организацијата World Weather Attribution (WWA) која ги анализира врските меѓу климатските промени и екстремните временски појави, објавена во Гардијан, покажа дека најтоплите двонеделни периоди забележани оваа година во три од четирите анализирани морски региони би биле речиси невозможни во прединдустриска клима, односно пред значително затоплување на планетата предизвикано од човечки активности.

Научниците ги анализирале Келтското Море и околните води, Бискајскиот Залив и областа покрај Иберискиот Полуостров, како и западните и источните делови на Средоземното Море.

Зголемена температура на водата

Утврдено е дека климатските промени ја зголемиле температурата на водата за околу два степени во Средоземното Море, за 1,4 степен во подрачјето на Бискајскиот Залив и Пиринејскиот Полуостров и за околу 1,3 степен во подрачјето околу Ирска и Ламанш.

Проширувањето на областите погодени од морските топлотни бранови е особено изразено. Оваа година, тие погодија околу 90 проценти од анализираната површина на Бискајскиот Залив и Иберискиот Полуостров, и околу 80 проценти од западниот Медитеран.

Сериозни последици 

Уште поизразена разлика е пронајдена во источниот Медитеран, кој ги вклучува Јадранското, Јонското и Егејското Море. Речиси 70 проценти од оваа област била погодена од морските топлотни бранови, додека во клима поладна за 1,4 Целзиусови степени, нивната очекувана покриеност би била само околу девет проценти.

Истражувачите предупредуваат дека екстремно топлите мориња можат да имаат сериозни последици за морските екосистеми. Високите температури можат да предизвикаат масовно изумирање на корали, сунѓери и макроалги кои обезбедуваат живеалиште за други видови, а потоа последиците се шират врз рибите, морските птици и цицачите.