Историска победа на крајнодесничарската АфД на изборите во Германија
Крајнодесничарската Алтернатива за Германија (АфД) убедливо го освои првото место на денешните покраински избори во Саксонија-Анхалт, покажуваат излезните анкети, со што партијата се најде на чекор од преземање на власта во една германска покраина првпат по Втората светска војна, објави Ројтерс.
АфД освои 44,5 отсто од гласовите, додека конзервативците на канцеларот Фридрих Мерц останаа далеку зад неа со 18,5 отсто, покажува излезната анкета на јавниот сервис АРД. Социјалдемократите од левиот центар и Зелените успеаја да го надминат минималниот изборен праг за влез во покраинскиот парламент.
„Испишавме историја во оваа земја“, изјави Улрих Зигмунд, 35-годишниот водечки кандидат на АфД во Саксонија-Анхалт, кој привлече илјадници луѓе на предизборните митинзи и повеќепати ја претставуваше победата во покраината како прв чекор кон освојување на власта на национално ниво на сојузните избори во 2029 година.
Резултатот претставува голем исчекор за АфД во нејзината борба за власт на национално ниво и сериозен удар за коалициската влада на Мерц. Сепак, сè уште не е јасно дали АфД ќе може да формира покраинска влада.
Излезноста била околу 76 отсто, значително повисока од вообичаената на покраинските избори.
Многу ќе зависи од тоа дали левичарската популистичка партија Сојуз Сара Вагенкнехт, која би можела да му биде коалициски партнер на АфД, ќе успее да го помине изборниот праг. Различните излезни анкети ја покажуваат непосредно над или под прагот.
Копретседателката на АфД, Алис Вајдел, го оцени резултатот како „историски“ и рече дека партијата добила јасен мандат да владее. Сепак, веднаш по затворањето на гласачките места не беше јасно дали ќе може да обезбеди мнозинство за формирање влада.
Покраинскиот премиер Свен Шулце ѝ честиташе на АфД и призна дека резултатите покажуваат оти таа е најсилната партија.
Доколку АфД не може самостојно да владее, би можел да следува долг процес на формирање коалиција меѓу традиционалните партии, кои се решени да ја задржат надвор од власта партијата што е предмет на истрага на германската Служба за заштита на уставот поради сомневања за десничарски екстремизам.
Програмата на АфД предвидува училиштата и културните институции повеќе да се насочат кон традиционалните вредности, ограничување на имиграцијата и реформа на јавниот радиодифузен систем.
Цврста политика кон миграцијата
Иако партиите од тврдата десница зајакнаа и во други делови на Европа, нацистичкото минато на Германија придонесува традиционалните партии да одбиваат соработка со АфД, која се залага за построга политика кон миграцијата и за подобри односи со Русија.
АфД ги отфрла обвинувањата за екстремизам, нарекувајќи ги заплашување и навреда за милионите нејзини поддржувачи.
Денешниот резултат е уште еден удар врз авторитетот на Мерц, чија популарност опаѓа додека неговата коалициска влада се обидува да го оживее економскиот раст во најголемата европска економија.
Во сè порасцепканиот германски политички пејзаж, АфД сега е најпопуларната партија на национално ниво, иако другите партии ја исклучуваат можноста за коалиција со неа, придржувајќи се до политиката позната како „заштитен ѕид“.
Нина Варкен, висока функционерка на конзервативците, денешниот резултат го нарече пресвртна точка за Германија.
