„Трикафта“ за сите остана само ветување 

Дали, кога и колку пациенти ќе добијат Трикафта? Овие прашања и понатаму ги мачат болните од цистична фиброза и нивните семејства. Како се доближува крајот на годината од Асоцијацијата велат многу од пациентите се обесхрабрени и ја губат довербата. Се уште го чекаат состанокот со министерот за здравство за да слушнат до каде е постапката за набака на лекот за кој како што велат за нив живот значи. Последната средба ја имале во јуни.

-Очекувањата наши се дека до средината на овој месец ќе не побараат и ќе ни кажат што е договорено и кои ќе бидат насоките по кои ќе се движиме, бидејќи ни беше ветено дека ќе ја добиеме терапијата до крајот на годината, изјави Фики Гаспар, претседател на Асоцијацијата за цистична фиброза.

Доколку не бидат повикани во министерството и не добијат конкретни гаранции, од Асоцијацијата не ја исклучуваат можноста повторно да организираат протести, а најавуваат и тужби против државата.

– Има многу пациенти кои за жал се обесхрабрени, изгубија надеж во целата процедура зошто се влечкаат многу работите. Се подготвува план и програма за тужби против државата потпомогнати од одредени правни структури кои сакаат да ни помогнат, а најмногу разговараме за опцијата протест, додаде Гаспар.

Последната информација од здравствените власти која беше споделена со медиумите е дека Владата обезбедила 100 милиони денари за набавка на Трикафта до крајот на годината, но нема детали дали колку пациенти ќе бидат прокриени и за колку време ќе имаат терапија?