Горештини од рано наутро, па невреме – Од средина на неделата уште полош пресврт со времето

Претпладне времето ќе биде претежно сончево со мала до умерена облачност. Во попладневните часови се очекува развој на нестабилна облачност, проследена со дожд, грмежи и засилен ветер, а локално се можни и врнежи од град.

Ќе дува слаб до умерен ветер од северен правец, кој повремено ќе се засилува. Минималната температура ќе се движи меѓу 10 и 18 степени, додека максималната ќе достигне од 29 до 38 степени.

Во Скопје претпладне ќе преовладува сончево време со мала до умерена облачност. Попладне се очекува нестабилност со можност за дожд, грмежи и засилен северен ветер.

Минималната температура ќе изнесува околу 17 степени, а максималната ќе достигне до 35 степени.

Во следните денови ќе продолжи променливо облачно и нестабилно време со повремени врнежи од дожд, поизразени во вторник и среда, кога локално се очекуваат и над 15 литри дожд на квадратен метар. На одделни места процесите може да бидат поинтензивни и да се манифестираат како краткотрајно невреме со пороен дожд, силен ветер, грмежи и услови за појава на град. Ќе дува умерен ветер, претежно од северен правец.