АГЕЛЕР: Се надевам дека дискурсот на кампањата ќе се фокусира на суштинските прашања, а не на лични напади 

Изборите се за граѓаните, но и за иднината на оваа држава, вели американската амбасадорка Анџела Агелер. 

Таа денеска кажа дека се надева дека дискурсот на изборната кампањата ќе се фокусира на суштинските прашања, а не на лични напади. 

„Кога би можел да дадам една препорака до кандидатите од целиот политички спектар, тоа би било да запомнат дека овие, но и сите други избори се за граѓаните на оваа земја. Тие се за иднината на која се надева и заслужува оваа земја и нејзиниот народ. Затоа, се надевам дека дискурсот на кампањата ќе се фокусира на суштинските прашања, а не на лични напади, бидејќи верувам дека луѓето се уморни од негативноста“, изјави Агелер за порталот PRESSonline.al.

Вели дека дури тогаш гласачите ќе можат да направат избор меѓу кандидатите за оние за кои веруваат дека најдобро ќе им помогнат да ги остварат своите надежи и соништа за себе, нивните деца и нивното општество.

Агелер се надева дека овие одлуки ќе ја доближат државата до целосна интеграција во европската заедница. Таа нагласи дека владините институции треба да воспостават процеси за слободни и фер избори за претседателските и парламентарните избори.

„Гласачите мора да се информираат преку сигурни извори на информации, а да ги препознаат и отфрлат сите дезинформации и манипулации. И што е најважно, гласачите мора да гласаат! Демократијата функционира кога сите ја исполнуваме нашата обврска. Моите очекувања за изборите се исти како и оние на гласачите, а тоа е целиот процес, од периодот на кампањата до формирањето на идната влада, да се одвива на транспарентен начин, преку кој ќе се обезбедат слободни и фер избори“, кажа Агелер.

Во тек е собирање на потписи во ДИК, а дел од кандидатите успеаја да ги соберат потребните 10.000 потписи.  Кандидатите со најслаба поддршка, како и останатите подобро рангирани имаат рок до 8 март да обезбедат 10.000 потписи.