За еден ден 27 повеќе прегледи во Гостивар, Министерството тврди дека состојбата е стабилна

Министерството за здравство тврди дека епидемиолошката состојба во Гостивар е стабилна, иако во последното деноноќие е забележано зголемување на бројот на пациенти кои побарале лекарска помош.

Во текот на вчерашниот ден биле регистрирани 84 први прегледи, што е за 27 повеќе во споредба со претходниот ден, кога биле евидентирани 57 прегледи.

Од Министерството посочуваат дека, и покрај дневното зголемување, бројот на прегледи е значително понизок во споредба со 18 јули, кога биле регистрирани 649 први прегледи.

Надлежните здравствени институции продолжуваат да ја следат состојбата. Во соопштението не се наведени причините за новото зголемување, ниту бројот на хоспитализирани пациенти.