НАТО пресретна руски воени авиони што го нарушија естонскиот воздушен простор 

Три руски воени авиони што го нарушија естонскиот воздушен простор беа пресретнати од НАТО, соопшти воениот сојуз, пренесе Би-би-си.

Министерството за надворешни работи на Естонија во Талин го осуди упадот како „дрзок“. Тоа рече дека денеска три руски борбени авиони МиГ-31 влегле во воздушниот простор на членка на НАТО „без дозвола и останале таму вкупно 12 минути“ над Финскиот Залив.

Портпаролката на НАТО, Алисон Харт, изјави дека воената алијанса „веднаш реагираше и ги пресретна руските авиони“, нарекувајќи го „уште еден пример за неодговорно руско однесување и способност на НАТО да одговори“. Таа не даде дополнителни детали.

Руската војска јавно не коментираше за ова прашање.

Тензиите меѓе западната воена алијанса и Русија се зголемија последнава недела, откако Полска и Романија – и двете членки на НАТО – соопштија дека руски беспилотни летала го нарушиле нивниот воздушен простор.

Министерството за надворешни работи на Естонија соопшти дека го повикало рускиот вршител на должноста амбасадор „за да поднесе протестна нота“ поради денешниот упад, додека високата дипломатка на ЕУ, Каја Калас, го опиша инцидентот како „исклучително опасна провокација“.

Во соопштението, естонскиот министер за надворешни работи, Маргус Цахна, рече дека упадот во петокот бил „невидено дрзок“.

Тој продолжи: „На сè почестото тестирање на границите од страна на Русија и растечката агресивност мора да се одговори со брзо зголемување на политичкиот и економскиот притисок“.

Министерот додаде дека Русија веќе четири пати го нарушила воздушниот простор на Естонија во 2025 година.

Во објава на Икс, Калас, која е естонска државјанка, рече дека ЕУ „ќе продолжи да ги поддржува нашите земји-членки во зајакнувањето на нивната одбрана со европски ресурси“.

Таа рече дека рускиот претседател Владимир Путин „ја тестира решителноста на Западот. Не смееме да покажеме слабост“.

Повторувајќи ги нејзините зборови, претседателката на Европската комисија, Урсула фон дер Лаен, напиша на Икс: „Ќе одговориме на секоја провокација со решителност, инвестирајќи во посилно источно крило.“

„Како што ескалираат заканите, така ќе ескалира и нашиот притисок“, додаде таа.

Естонските медиуми известуваат дека во најновиот инцидент, на руските авиони им биле исклучени транспондерите.