Трамп: САД и Иран некако се договорија за нуклеарниот договор 

Американскиот претседател Доналд Трамп изјави денес дека Соединетите Американски Држави и Иран „некако“ се согласиле за условите на договорот за нуклеарниот потенцијал на Иран, што дава доверба дека самиот договор наскоро ќе биде постигнат.

Зборувајќи со новинарите на бизнис тркалезна маса во Доха, Катар, Трамп ги опиша разговорите меѓу американскиот претставник Стив Виткоф и иранскиот министер за надворешни работи Абас Арагчи како „многу сериозни… за долгорочен мир“.

Сепак, за време на неговата посета со арапските лидери во Заливот оваа недела, американскиот претседател нагласи дека воена акција против нуклеарните постројки на Иран е можна доколку преговорите не успеат.

„Иран некако ги прифати условите… тие нема да креваат, како што јас пријателски го нарекувам, „нуклеарна прашина“. „Во Иран нема да се создава никаква „нуклеарна прашина“, кажа Трамп.

Тој не даде детали, но посочи дека има зголемено усогласување со условите што ги побара.

Висок политички, воен и нуклеарен советник на врховниот лидер на Иран, ајатолахот Али Хамнеи, во средата за Ен-би-си изјави дека Техеран е подготвен да се ослободи од своите залихи на високо збогатен ураниум за оружје и да се согласи да збогатува ураниум само до пониските нивоа потребни за цивилна употреба и да им дозволи на меѓународните инспектори да го следат процесот. Но, Шамкани додаде дека за возврат Иран сака веднаш да ги укине сите економски санкции.

Трамп рече дека неговите барања се едноставни.

„Тие не можат да имаат нуклеарно оружје. Тоа е само едно нешто. Многу е едноставно. Не е како да морам да ви дадам 30 страници детали. Тоа е само една реченица. Тие не можат да имаат нуклеарно оружје“, рече Трамп.

Сепак, американскиот претседател вчера посочи дека очекува Техеран да направи и други отстапки во рамките на потенцијалниот договор.

„Иран мора да престане да го спонзорира тероризмот, да ги запре крвавите посреднички војни и трајно и проверливо да го прекине стремежот кон нуклеарно оружје“, кажа Трамп на состанокот во Саудиска Арабија со лидерите на Советот за соработка во Заливот (ГЦЦ). И потоа кажа дека Иранците „не можат да имаат нуклеарно оружје“.

Трамп ги посочи земјите од Заливот, како што се Саудиска Арабија и Катар, како модели за економски развој во регионот исполнет со конфликти. Тој ги повика катарските власти да го искористат своето влијание за да го поттикнат Иран да се согласи на нуклеарен договор со САД.

Трамп оваа недела е на турнеја на Блискиот Исток, за време на која ги посети Саудиска Арабија, Катар и Обединетите Арапски Емирати, а Абу Даби во Емиратите е последното место на неговото патување на Блискиот Исток.