Трамп: Значително ќе ја зголемам трговијата со Индија и Пакистан 

Денес, меѓу Индија и Пакистан е во сила кревко примирје, по ноќните борби меѓу двата нуклеарно вооружени соседи, а американскиот претседател Доналд Трамп изјави дека ќе работи на наоѓање решение за Кашмир. Двајцата традиционални соперници разменуваа интензивен оган четири дена, најлошиот во речиси три децении. Тие испукаа ракети и беспилотни летала врз воени објекти, а десетици луѓе загинаа.

Договорот за прекин на огнот беше постигнат по дипломатски притисок од САД, но за неколку часа започна артилериски оган во индискиот дел од Кашмир, средиштето на поголемиот дел од борбите. Експлозии од системите за противвоздушна одбрана одекнуваа во градовите околу границата, кои беа без струја, слично како и претходните две вечери, според властите, жителите и очевидци на Ројтерс.

Доцна синоќа, индиските власти соопштија дека Пакистан го прекршил договорот за прекин на огнот и дека на индиските вооружени сили им е наложено „силно да реагираат“ на секое прекршување. Пакистан соопшти дека е посветен на прекинот на огнот и ја обвини Индија за прекршување.

До зори, борбите и експлозиите за кои се известуваше во текот на ноќта од двете страни на границата стивнаа, според очевидци на Ројтерс. Снабдувањето со електрична енергија е обновено во повеќето области долж пограничните градови на Индија.

Трамп ги пофали лидерите на двете земји за согласноста да ја запрат агресијата. „Иако за тоа не станува збор, значително ќе ја зголемам трговијата со двете големи нации. Дополнително, ќе соработувам со вас за да видиме дали може да се постигне решение за Кашмир“, рече Трамп во објава на Трут соушл.

Борбите започнаа во среда, две недели откако 26 мажи беа убиени во напад врз хиндуси во туристичкиот град Пахалгам, во индискиот дел на Кашмир.

Двете земји, создадени по британската колонијално владеење во 1947 година, војуваа три пати, двапати поради регионот Кашмир. И Индија, каде што мнозинството се хиндуисти, и муслиманскиот Пакистан владеат со делови од Кашмир, но секоја страна го присвојува во целост.