Првиот меѓународен авион слета во Техеран по израелските напади 

Флај Дубаи стана првиот меѓународен превозник што слета на аеродромот „Имам Хомеини“ во Техеран во понеделникот, по 20-дневната суспензија на летовите воведена по израелските напади врз Иран, објави официјалната новинска агенција ИРНА.

Пристигнувањето на авионот на летот ФЗ1930 на најголемиот аеродром во Иран од базата на авиокомпанијата во Обединетите Арапски Емирати го означи почетокот на постепеното враќање кон нормалните операции во иранскиот воздушен простор, соопшти ИРНА. Флај Дубаи е нискобуџетен превозник и сестринска авиокомпанија на Емирати.

Локалните власти го опишаа слетувањето како знак на обновена стабилност и ефикасно управување со кризи во воздухопловниот сектор на земјата. Патничкиот сообраќај се одвива со целосни безбедносни протоколи, објави ИРНА.

Меѓународниот и домашниот воздушен сообраќај беа запрени по израелските воздушни напади и се зголеми загриженоста за безбедноста на иранското небо. Аеродромите во Иран се повторно отворени за домашни и меѓународни летови, освен оние во градовите Исфахан и Тебриз, а воздушниот простор на земјата е отворен и за меѓународни транзитни летови, објавија државните медиуми.