Падна бугарската влада
Бугарскиот премиер Росен Жељазаков поднесе оставка на својата влада по повеќенеделните улични протести поради нејзините економски политики и неуспехот во борбата против корупцијата.
Жељазаков ја објави својата оставка во телевизиско обраќање неколку минути пред парламентот да гласа за доверба на владата. Тоа требаше да биде шестото такво гласање откако владата ја презеде функцијата на 15 јануари оваа година. Оставката дојде помалку од еден месец пред планираниот влез на земјата во еврозоната на 1 јануари.
Илјадници Бугари се собраа синоќа во протест против малцинската влада и, како што велат, нејзиниот неуспех да се справи со ендемската корупција во најсиромашната земја-членка на Европската унија.
Протестите во главниот град Софија и десетици други градови низ соседната земја се најнови во низата вакви настани додека Бугарија се подготвува да го воведе еврото на 1 јануари.
На зградата на парламентот во центарот на Софија, демонстрантите со ласери ги проектираа зборовите „Оставка“, „Мафијата надвор“ и „За фер избори“.
Минатата недела владата го повлече својот буџетски план за 2026 година, првиот составен во евра, поради масовните протести. Опозициските партии и други организации изјавија дека протестираат против плановите за зголемување на придонесите за социјално осигурување и данокот на дивиденди за финансирање поголеми трошоци на владата.
И покрај владините отстапки во врска со буџетот, протестите продолжуваат со несмален интензитет во земјата која одржа седум национални избори во последните четири години – последните во октомври 2024 година – во услови на длабоки политички и социјални поделби.
