„Не чекајте да ожедните“: Дехидрацијата го намалува крвниот притисок и го зголемува ризикот од мозочен удар 

Недостатокот на вода во организмот, односно дехидрацијата, не се манифестира само со замор или главоболка. Особено во жешките летни денови, недоволниот внес на течности може да биде сериозен ризик-фактор за настанување на мозочен удар, предупредува неврологот д-р Фелипе Де Лос Риос Ла Роса од Институтот за невронаука при Баптистичката болница во Мајами, пишува „Е-клиника“.

Дехидрацијата како ризик кај ранливи пациенти

Како што објаснува докторот, мозочниот удар настанува кога ќе се прекине или намали дотокот на крв и кислород во одредени делови од мозокот. Кога телото нема доволно вода, крвта станува погуста, што го зголемува ризикот од формирање тромбови кои можат да затнат клучни артерии и да предизвикаат мозочен удар.

Најзагрозени се лицата кои:

• веќе имале мозочен удар,
• имаат висок крвен притисок,
• имаат покачени нивоа на шеќер, холестерол или триглицериди,
• имаат нарушувања на коагулацијата или срцев ритам,
• имаат стеснување на каротидните артерии,
• имаат вештачки срцеви залистоци или дилатативна кардиомиопатија.

Дополнителни ризици се и дебелината, физичката неактивност, лошата исхрана, пушењето, алкохолот и стресот.

„Особено се ранливи пациентите кои веќе имале мозочен удар, бидејќи дехидрацијата може да го поттикне следниот – кој, по правило, е потежок. Затоа, во денови со високи температури, неопходно е да се внесува доволно вода“, истакнува д-р Де Лос Риос.

Топлотен удар и зголемен ризик од исхемичен мозочен удар

Најчестиот вид мозочен удар е исхемичниот – настанува поради запушување на крвниот сад со тромб (крвен згруток), обично во сад зафатен од атеросклероза. Кај пациенти со неконтролиран притисок, изложени на топлина и без доволен внес на вода, може да дојде и до топлотен удар, при што телесната температура се искачува над 40 степени целзиусови, што дополнително го зголемува ризикот од мозочен удар.

Зошто е важно да се пие доволно вода?

„Внесот на течности не е само здрава навика, туку и директен начин за заштита од мозочен удар“, вели д-р Де Лос Риос.

Хидратацијата помага во регулирање на крвниот притисок, ја одржува крвта во оптимална густина, го снабдува мозокот со хранливи материи и кислород. Дури и кај лица кои веќе претрпеле мозочен удар, доволниот внес на вода може да придонесе за полесен тек и побрзо закрепнување во случај на повторен удар.

„Во моментот кога чувствувате жед, организмот веќе е дехидриран. Затоа пијте вода редовно, без да чекате да ожедните“, советува докторот.

Како да препознаете дехидрација?

Иако потребите за вода се индивидуални, урината со светложолта боја е добар знак дека телото е доволно хидрирано.

Превенција: што треба да правиме?

• Зголемете го внесот на вода за време на физички активности, особено на отворено.
• Избегнувајте прекумерно пиење кафе и алкохол – тие го поттикнуваат исфрлањето на течности.
• Консумирајте храна богата со вода: краставици, зелена салата, лубеница, портокали.

„Хидратацијата не е само дел од здравиот животен стил – таа е клучен дел од превенцијата на мозочниот удар“, заклучува д-р Де Лос Риос.