Италија и Белгија најпогодени од блокадата на Ормускиот теснец

Речиси целосниот колапс на комерцијалниот превоз низ Ормускиот теснец им нанесе удар и на земјите од Европската Унија, а Италија и Белгија се најмногу изложени на ризик, покажа студија.

Ризиците се најизразени во група земји, според студијата на Институтот за разузнавање на синџирот за снабдување во Австрија (АСЦИИ), Центарот за наука за комплексност (ЦСХ) во Виена и Технолошкиот универзитет Делфт.

Во Европската Унија најмногу е загрозена Италија, бидејќи увезува стока во вредност од околу 9,8 милијарди долари годишно од земјите што граничат со Персискиот Залив, покажа истражувањето.

Бројката вклучува и увоз на течен гас од Катар во вредност од околу 4,4 милијарди долари годишно, и пропан во вредност од приближно 3,2 милијарди долари.

Белгија, од друга страна, годишно увезува катарски течен природен гас (ЛНГ) во вредност од околу 5,8 милијарди долари, главно преку пристаништето Зебриж, и е изложена на економски ризици, покажа студијата.

Покрај трговијата со гас, Ормускиот теснец е исто така важна рута за глобалната трговија со дијаманти, која патува од Обединетите Арапски Емирати до Антверпен.

Германија увезува стока во вредност од приближно 5,7 милијарди долари годишно, главно од Обединетите Арапски Емирати, и тоа најмногу бродови, јахти и индустриска опрема, во вредност од 4,2 милијарди долари.

Вредноста на увозот од Катар, главно пропан и специјални гасови, е околу 600 милиони долари.

Сепак, поширокиот европски регион покажува најголем ризик за Обединетото Кралство, кое увезува стока во вредност од околу 12,9 милијарди долари годишно од регионот на Блискиот Исток, од кои приближно 5,9 милијарди долари отпаѓаат на гасни производи од Катар.

Економските ефекти во голема мера ќе зависат од времетраењето на иранската блокада, нагласува авторот на студијата, Стефан Турнер, додавајќи дека ако трае подолго од четири недели, нарушувањата би можеле да се прошират низ глобалните синџири на снабдување.

Иран ја презеде контролата врз Ормускиот теснец по американско-израелскиот напад, забранувајќи го транзитот за бродови поврзани со САД, Израел, европските земји и нивните сојузници.