Два земјотреса регистрирани рано утринава во Македонија 

Телеметриската сеизмолошка мрежа на Република Северна Македонија, одржувана од Сеизмолошката опсерваторија при Природно-математичкиот факултет во Скопје, регистрираше два земјотреса рано утринава со епицентри во подрачјето Пештани–Охрид–Струга.

Првиот земјотрес е забележан во 5 часот и 7 минути со локална магнитуда од ML3.4 според Рихтеровата скала, а вториот девет минути подоцна, во 5:16 часот, со магнитуда од ML2.3. Епицентарите се наоѓаат на околу 100 километри југозападно од Скопје.

Според досегашните податоци на опсерваторијата, првиот земјотрес бил почувствуван во Охрид, Струга и нивната околина со интензитет од IV степени според Европската макросеизмичка скала. За среќа, нема информации за причинета материјална штета или повредени лица.