Германските војници го напуштија Гренланд по помалку од 48 часа

Германски извидувачки тим на Бундесвер го напушти Гренланд по помалку од два дена престој.

Повлекувањето го објавија Билд и Шпигел, а информацијата за новинската агенција ДПА ја потврди портпаролот на германското Министерство за одбрана. Според Билд, кој прв ја објави веста, војниците биле информирани за ненадејното заминување дури утрово.

„Уште вчера не беше јасно колку долго ќе останат“, рече Мориц Милер, еден од новинарите што го следат случајот.

Билд објави дека вкупно 15 германски војници, под команда на адмиралот на флотата Стефан Паули, биле видени на аеродромот Нуук во недела попладне по германско време, каде што се качиле на редовен лет на „Исландер“ до Кефлавик во Исланд. Наредбата за враќање дошла рано наутро од Берлин. Полетувањето било закажано за 14 часот по германско време, но летот бил одложен бидејќи авионот морал да се одмрзне.

Според Билд, уште во саботата се зборувало дека германските војници би можеле да останат подолго од планираното, но тоа сепак не се случило, без дополнително известување или официјална најава.

Германското Министерство за одбрана потврди дека првично бил планиран лет до данската воена база Кангилининуит, каде што требало да се изврши извидувачка активност, но тој лет бил откажан поради лоши временски услови. После тоа, била донесена одлука за враќање.

Министерството претходно соопшти дека не сака да навлегува во детали за датумот на заминување поради можни промени на терен. Дополнителна неизвесност предизвика фактот што германските војници пристигнаа во Гренланд еден ден подоцна од планираното. Првично било планирано тие да летаат директно со воен авион „Ербас А400М“ и да останат од 15 до 17 јануари, но патувањето на крајот било реализирано преку Данска, а тие пристигнале во Гренланд дури на 16 јануари, со дански авион.

Петнаесет припадници на армијата, воздухопловните сили и морнарицата пристигнаа во Гренланд во петокот како дел од извидувачка мисија на сојузниците на НАТО, на покана на Данска. Целта беше да учествуваат во воена вежба и да ги проценат можностите за идни вежби и евентуално стационирање на силите.

Мисијата беше започната откако во среда пропадна состанокот меѓу министрите за надворешни работи на Данска, Гренланд и САД во Вашингтон.

Германското Министерство за одбрана наведува дека престојот првично требало да биде продолжен за спроведување дополнителна извидувачка активност во недела, 18 јануари, но бил откажан поради временските услови, поради што враќањето било реализирано во недела попладне.