Во Њујорк прогласена вонредна состојба поради обилни снежни врнежи

Голема зимска бура донесе обилни снежни врнежи и опасен мраз во делови од североистокот на Соединетите Американски Држави, се очекува Њујорк да ги доживее најголемите снежни врнежи во последните четири години.

Сојузната држава Њујорк прогласи вонредна состојба откако обилните снежни врнежи донесоа мраз и лизгање на патиштата со значително намалена видливост во петокот, што го направи патувањето исклучително опасно.

Предупредување за зимска бура остана на сила за регионот до сабота попладне. На некои места се предвидува и замрзнат дожд. Бурата го погоди Њујорк за време на прометниот период по Божиќ, кога милиони луѓе се во движење. Националната метеоролошка служба прогнозира дека во градот ќе паднат до 13 сантиметри снег, а се очекуваат до 28 сантиметри снег во областите северно и североисточно од градот.