Бројот на загинати во Мјанмар се искачи на 3.003, несезонските дождови ги отежнуваат спасувачките напори

Бројот на загинати во разорниот земјотрес во Мјанмар надмина 3.000, а стотици сè уште се водат како исчезнати, додека прогнозите за несезонските дождови претставуваат нов предизвик за спасувачите и хуманитарните работници.

Земјотресот со јачина од 7,7 степени според Рихтеровата скала што го погоди Мјанмар пред шест дена, еден од најсилните во оваа земја во југоисточна Азија на векот, го потресе регионот каде живеат 28 милиони луѓе, уривајќи згради, срамнувајќи заедници, а многумина остави без храна, вода и засолниште.

Бројот на загинати вчера се искачи на 3.003, со 4.515 повредени и 351 исчезнати, објави амбасадата на Мјанмар во Јапонија на Фејсбук. Условите би можеле да станат потешки откако се предвидува несезонски дожд од недела до 11 април да ги загрози областите најтешко погодени од земјотресот, како што се Мандалеј, Сагаинг и главниот град Најпидау.

„Дожд доаѓа и има уште толку многу затрупани“, изјави хуманитарец во Мјанмар за Ројтерс. „А особено во Мандалеј, ако почне да врне, луѓето кои се под урнатините ќе се удават дури и ако преживеале до овој момент“.

Досега имало 53 достави на помош за Мјанмар од воздух, се додава во соопштението на амбасадата во Јапонија, додека повеќе од 1.900 спасувачи пристигнале од 15 земји, вклучувајќи ги соседите, како и Кина, Индија и Русија. Речиси една недела по земјотресот, спасувачите во соседен Тајланд прочешлаа рид од урнатини кој остана по уривањето на облакодерот во изградба во главниот град Бангкок, во потрага по преживеани.

Спасувачите користат машини и булдожери за да разбијат 100 тони бетон и да ги лоцираат евентуалните преживеани по уривањето на облакодерот во кој загинаа 15 лица, додека 72 сè уште се водат како исчезнати. Во Тајланд загинаа вкупно 22 лица.