Британија ја поддржува идната палестинска државност, но „прекинот на огнот е главен приоритет“ 

Повеќе последователни британски влади изјавија дека формално ќе признаат палестинска држава „во вистинско време“, без никогаш да прецизираат кога тоа ќе се случи.

„Ние сакаме палестинска државност, но исто така сакаме да обезбедиме околности во кои таквото долгорочно политичко решение може да има простор за развој“, изјави за Скај њуз британскиот министер за наука и технологија, Питер Кајл.

„Но сега мора да се фокусираме на она што ќе го ублажи страдањето, а страдањето во Газа е екстремно, неоправдано и мора да биде наш приоритет“, додаде тој.

Неговите коментари дојдоа откако францускиот претседател Емануел Макрон изјави дека Франција има намера да признае палестинска држава во септември на Генералното собрание на ОН, потег што Израел и САД силно го осудија.

Во вчерашната изјава британскиот премиер Кир Стармер рече дека државноста е „неотуѓиво право на палестинскиот народ“, повторувајќи го својот повик за прекин на огнот како неопходен чекор кон решение со две држави.

Зборувајќи за време на посетата на Австралија, министерот за надворешни работи Дејвид Лами ги повтори повиците за прекин на огнот и ја опиша ситуацијата во Газа како „неодбранлива“.

Здравствените власти во Газа велат дека повеќе од сто луѓе починале од глад, повеќето од нив во последните недели.

Групите за човекови права соопштија дека масовниот глад се шири и покрај тоа што тони храна и други залихи стојат недопрени на влезот во енклавата.