Боки 13 ќе предаде над милион „бомби“ – кој ќе биде на тапет?

Во операцијата „Бумеранг“ на Боки 13, повеќе од еден милион „бомби“ ќе бидат предадени кај обвинителот Ислам Абази.

Боки 13 преку адвокатите соопшти дека овие фајлови ќе бидат предадени на Обвинителство за гонење на организиран криминал и корупција, а кои се однесуваат на сторен криминал од највисоки државни структури и бизнис елити. Во соопштение до јавноста, стои дека со оформувањето на предмет од страна на шефот на Обвинителството, Ислам Абази, започнува кривично-правната операција со кодно име „Бумеранг“.

„Напоменуваме дека поради обемноста на материјалот и доказите во бројка од 1.150.000 (еден милион и сто и педесет) фајлови со податоци во кои се содржани аудио снимени разговори, транскрипти, пораки, остварени телефонски комуникации, видео и фотографски записи, т.н. “бомби” , заради целисходност при постапување по предметот ќе биде потребно формирање на посебен тим за работа и процесуирање на кривичните пријави во согласност со реалните потреби за ефикасно и правилнло постапување по предметот, за кое нешто ќе истакнеме посебно барање до јавниот обвинител“, велат адвокатите на Јовановски.

Поради обемноста на доказите, ќе треба цел тим да работи на материјалите.

„Поради високиот степен на карактерот и сериозноста на процесот “Бумеранг” бараме и очекуваме посветеност, неселективност и максимална професионалност од страна на надлежниот обвинител. Исто така, напоменуваме дека подносителот Бојан Јовановски ќе ги поднесува пријавите и ќе ги предаде доказите на записник по претходно утврдени законски гаранции за заштита на неговиот физички и психички интегритет поради карактерот, сензитивноста и сериозноста на отпоцнатиот процес со кодно име “Бумеранг”. Бојан Јовановски ќе ги поднесе пријавите и ќе ги предаде доказите во присуство на неговите полномошници мр.Владимир Туфегџиќ и Сашко Дукоски, адвокати од Скопје, единствено во сигурносно обезбедени простории во ОЈО за ГОКК, со визуелно, тонски запис од чинот на сослушување и предавање на доказите“, посочува адвокатскиот тим преку кои Јовановски и се обраќа на јавноста.

Абази веќе потврди дека ќе го истражат случајот. Основното јавно обвинителство за гонење организиран криминал и корупција оформи предмет за „бомбите“ на Бојан Јовановски. Инаку, Боки 13 е осуден во случајот „Рекет“.