Норис славше во Бразил, Ферстапен со старт од пит стигна на подиум 

Ландо Норис триумфираше во Сао Пауло, возачот на Мекларен направи значаен исчекор кон титулата по одличниот викенд во Бразил.

Ландо Норис има +24 во однос на Оскар Пиастри и +49 во однос на Макс Ферстапен на три трки до крајот на сезоната, Британецот имаше одличен викенд во Сао Пауло, каде по триумфот во спринтот, денеска победи и во главната трка.

Возачот на Мекларен вечерва немаше конкуренција, беше во водство од почеток до крај и мина прв низ целта со десет секунди предност.

Зад него имаше драма до последен миг, Кими Антонели беше извонреден и финишираше како втор, а неверојатно издание имаше и Макс Ферстапен, кој стартуваше од пит-лејнот но успеа да се искачи на подиумот.