Нема место за паника поради конго-кримската треска, вели д-р Петличковски 

Нема место за паника, апсолутно ниту е потребна, ниту е продуктивна на некој начин, изјави претседателот на Комисијата за заразни болести, Александар Петличковски, во врска со конго-кримската хеморагична треска од која во земјава се регистрирани три случаи, а по состанок со министерот за здравство, Фатмир Меџити. Тој пак изјави дека брзата реакција на здравствените власти спречила експоненцијален раст на заразени со конго-кримска хеморагична треска (ККХТ).

Се работи за болест за која што и Македонија важи како ендемско подрачје, а заклучоците од комисијата, како што рече Петличковски, се во насока на превентивни мерки.

„Информирање на населението и на здравствените работници на кој начин се добива болеста, размислување за оваа болест кога ќе има сомнителни случаи и брзо процесирање, односно испраќање на сомнителните случаи до институциите, односно до одделите за инфективна патологија или до Клиниката за инфективни болести“, рече Петличковски.

Тестови за оваа болест, како што кажа, во моментот има доволно, а дополнителна количина е нарачана и се очекува да пристигне. 

„И терапијата којашто има некаков ефект, е достапна што значи дека колку што може да биде подготвена една држава за ваква ендемска болест, ние сме подготвени“, истакна Петличковски.

Посочи дека оваа болест не се пренесува лесно, а пренесувањето е исклучиво по пат на каснување од крлеж кој што е заразен со вирусот. 

„Крлежи има особено во летните месеци, а затоплувањето на глобално ниво исто така придонесува за нивна поинтензивна активност. Меѓутоа, не секој крлеж е заразен со некој вирус. Така што, не се забранува на луѓето да одат на отворени површи, но, кога ќе излегуваат треба да имаат предвид и да бидат заштитени, нагласи Петличковски.

Според него, риболовците, ловџиите и сточарите се најмногу изложени на оваа опасност, како и здравствените работници заради контакт со телесните секрети од заразените.

Состојбата на пациентите заразени со вирусот, како што информираше Петличковски, е добра. 

„Болничарката е во сосем добра состојба. За неа кризата е помината и се очекува комплетно опоравување. Третиот пациент, рибарот од Велес е во добра состојба во моментов, меѓутоа има уште неколку дена во кои може да се случи промена. Се надевам дека тоа нема да дојде, и повторно доколку дојде до влошување на состојбата терапијата е тука. Така што, се надеваме на добар развој и тука“, рече Петличковски.

Морбидитетот на болеста, како што рече, е сериозен, но, исто така, нагласи дека има различни видови на вирусот, од кои дел се поврзани со висока смртност, а некои со ниска.  

„Откриваме дека стоката, животните во Македонија, се изложени на вирусот постојано. Значи не е тоа вирус што се појавил годинава, бидејќи истражувањата покажуваат дека некаде над 30 проценти од  говедата, овците, козите се со прележан вирус, односно биле во контакт со вирусот. Меѓутоа немаме информации за хоспитализирани случаи предизвикани од овој вирус, што значи дека вирусот е тука, меѓутоа, можно е поблагата варијанта да циркулира низ стоката“, посочи Петличковски.

Комисијата бара и организирање на акциски план во кој ќе се направи проценка на преваленцата на наоѓањето, односно колку често овие крлежи ги има во различните региони по што треба да следува дезинсекција која се смета за клучна превентивна мерка за намалување на ризикот од појава на оваа болест.

Во однос на резултатите од анализите од заловените крлежи, тој рече дека сѐ уште немаат резултати, но, дека очекуваат таа мерка да се спроведува и во следните две-три недели со цел да се добие репрезентативен број, односно што повеќе заловени крлежи, за да можат да идентификуваат евентуално дали се тие заразени со вирусот.

Брзата реакција на здравствените власти спречија експоненцијален раст на заразени со конго-кримска хеморагична треска (ККХТ), изјави министерот за здравство Фатмир Меџити по состанокот со членовите на Комисијата за заразни болести.

Според министерот, здравствениот систем навреме и соодветно одговорил по детектирањето на првите случаи на ККХТ.

„Министерството за здравство и сите здравствени иституции навремено и професионално одговорија и со набавка на соодветна терапија, која и покрај реткоста, за 24 часа стигна во нашата земја“, рече Меџити. 

Тој посочи дека останува во редовна комуникација и консултација со Комисијата за заразни болести, ИЈЗ, Инфективната клиника и доколку е потребно ќе бидат предложени соодветни мерки за подигнување на степенот на превенција на уште повисоко ниво.

Министерот Меџити на состанокот упати благодарност до сите здравствени работници кои го даваат максимумот да одговорат на потребите на пациентите.

На состанокот освен министерот Меџити и членовите од Комисијата за заразни болести учествуваа и претставници од Агенцијата за храна и ветеринарство, претставници од Факултетот за ветерина и од Центрите за јавно здравје од Штип и Велес.

Во Македонија досега се регистрирани три случаи на заразени со конго-кримската хеморагична треска. Еден од пацинетите почина на крајот на јули по директно каснување од крлеж.