Повеќе од 70 пациенти прегледани во рамки на „Мовембер“ во Геронтолошкиот завод Скопје
Во ЈЗУ Геронтолошки завод Скопје успешно беше одбележан „Мовембер“, месецот посветен на машкото здравје и превенцијата од карцином на простата. Во рамки на активностите, беа извршени ЕХО и уролошки прегледи на повеќе од 70 пациенти.
Директорката на установата, Ленче Нелоска, на својот Фејсбук-профил изрази благодарност до медицинскиот персонал кој учествувал во акцијата, меѓу кои и д-р Дарко Марковски, д-р Марика Филипова и д-р Марија Сековска, како и до сите вработени кои го посветиле денот на грижата за здравјето на граѓаните.
Нелоска им упати јавна благодарност и на градоначалниците на Општина Ѓорче Петров, Александар Стојкоски, и Општина Карпош, Сотир Лукровски, кои, како што наведе, постојано даваат поддршка за превентивни активности и унапредување на здравјето во заедницата.
