Огромна печурка Вргањ со тежина од еден килограм пронајдена во Делчевo

Во делчевскиот регион е пронајдена печурка со тежина од над еден килограм и периметар од близу половина метар, што ја прави една од најголемите пронајдени на ова подрачје годинава.

Младиот Бојан Ѓорѓиевски е среќникот кој печурката од сортата „вргањ“, ја пронашол во атарот на делчевското село Бигла и ова му е првпат да пронајде толку голема печурка.

Печурката ја пронајдов во атарот на село Бигла, маало Павлевци. Прво мислев дека е нешто друго, но кога се приближив испадна голема печурка. Капата на печурката беше со поголем обем, така што ми требаше поголем напор да ја извадам за да не биде оштетена. Печурката потоа ја оставив за сушење, за да биде продадена по поголема цена – вели Ѓорѓиевски.

Сезоната на печурки е во тек и во наредниот период, а како што додава Бојан, се очекува уште поголем наплив на печурките.

Јас сум трета година гимназија и уште од мал научив да ги познавам печурките. Тие секогаш никнуваат по дожд, а бидејки изминатата недела речиси секојдневно имаше врнежи, во наредниот период се очекува да има доста печурки. Најчесто собирам „вргањ“ поради повисоката цена, а се случува да најдам и лисичарка и јајчарка кои се доста застапени во нашиот крај – додава Ѓорѓиевски.

Поради големиот наплив на печурки, се очекува пад на цената на „вргањот“ кој се движи од 150 до 200 денари за килограм.

Според откупувачите, доколку има нови врнежи ова ќе биде година со најголем принос на печурки во Делчевско.

Leave a Reply

Your email address will not be published. Required fields are marked *

Следете нè на Facebook!


This will close in 30 seconds

Show Buttons
Hide Buttons